127. Baserrietan egon ohi ziren ur bedeinkatu ontziak. Ontziaren kikera torneatu egiten zuten, baina erlijio motiboren bat zuen plaka molde baten bidez egiten zuten. © Jose López, Xabi Otero

Aretxabaletako ontzi lantegiei buruz lehen aldiz herri horretako Jose Ramon Arenazak hitz egin zidan. Ontzi lantegiak Puerta del Sol auzoan zeuden kokatuta. Gaur egun ere, lantegiak egon ziren etxeari Las Ollerías esaten diote. Gero gertu dagoen bainuetxeko ostatu bihurtu zenez, eta Madriletik etortzen zirenez batez ere, auzoari Puerta del Sol izena jarri zioten. Inazio Azkoitia azken ontzigilearen herenilobak esan zidan ontzigile lanbidea zuten bere aurrekoak Zalduondotik etorri zirela. Aretxabaletako azken ontzigilea Julian Lopez de Muniain izan zen.